Божиќен подарок за Путин: Еден од најголемите сојузници на Украина ѝ врти грб

Томио Окамура, новиот претседател на долниот дом на чешкиот парламент, Претставничкиот дом, нареди отстранување на украинското знаме од зградата на парламентот, каде што беше истакнато во знак на солидарност од 2022 година, нарекувајќи го потегот „одреден симбол“.

Во видео кое го објави, лидерот на десничарската популистичка партија СПД држи скали на човек кој го симнува украинското знаме од фасадата на чешкиот парламент.

„Ова е одреден симбол. Украинското знаме е симнато од зградата на Претставничкиот дом по моја наредба, и беа потребни само неколку секунди“, изјави претседателот на парламентот за порталот iDNES.

Партијата СПД ја водеше својата изборна кампања под слоганот за отстранување на украинските знамиња од државните институции и власти. За време на предизборната кампања, лидерот на СПД, Томио Окамура, изнесе и низа други проукраински ставови, вклучувајќи повици за ограничување на правата на украинските бегалци во Чешка и запирање на воената поддршка за Украина.

Окамура во средата беше избран за претседател на Претставничкиот дом според коалицискиот договор меѓу неговата партија СПД, десничарското движење Мотористи и партијата АНО.

Три украински знамиња беа повторно поставени на зградата на парламентот откако Окамура го симна сино-жолтото знаме. Пратеничките клубови на Граѓанската демократска партија, партијата Градоначалници и независни (СТАН) и Пиратите ги закачија знамињата.

Чешка, една од најлојалните сојузнички држави на Украина, разгледува драстично намалување на испораките на оружје и муниција за Киев откако новата влада ќе ја преземе власта во следните недели. Оваа промена ја најави клучен лидер на идната владејачка коалиција, а веста прв ја објави Politico.

Филип Турек, претседател на десничарската популистичка партија Мотористи, која потпиша коалициски договор оваа недела, изјави дека неговата земја „ќе ги одржува обврските кон НАТО и ќе се придржува до меѓународното право.“

Сепак, додаде дека новата влада „ќе ги приоритизира дипломатските напори за завршување на војната во Украина и ќе го намали ризикот од конфликт во Европа, префрлајќи се од воена помош финансирана од националниот буџет на хуманитарна поддршка и фокусирајќи се на безбедносните потреби на Чешка.“

Партијата Мотористи, основана во 2022 година, на минатомесечните избори освои шест пратенички места и стана клучен партнер на мандатарот Андреј Бабиш и неговата партија АНО во формирањето на владата. Турек се спомнува како најверојатен кандидат за нов министер за надворешни работи.

Бабиш и претходно изрази сомнеж во големиот програм на сегашната влада за испорака на артилериски гранати на Украина, но од изборите наваму избегнуваше јасно да го дефинира својот став.

Заминувачкиот министер за надворешни работи, Јан Липавски, остро реагираше на најавите. „Ограничувањето на чешката воена помош за Украина е вест што сигурно ќе им донесе голема радост на руските војници на фронтот. Сметајте го ова за божиќен подарок од Бабиш за Владимир Путин“, изјави Липавски.

Според него, во политичките изјави на новата коалиција „зборот Русија не се споменува ниту еднаш“ и се избегнува соочување со агресијата на Кремљ. „Новата влада ќе ја поткопа безбедноста на Чешката Република“, заклучи Липавски.

Турек, пак, појасни дека новата влада ќе се постави кон Москва „со прагматична заштита на националните интереси“ и ќе избегнува „ескалација што би можела да ја загрози енергетската безбедност или економската стабилност на Чешка.“ Истакна дека „поширокиот фокус на суверенитет и неинтервенција сугерира внимателен пристап заснован на интересите.“

Додека Прага ја разгледува промената на видот на помошта за Киев, клучниот план на ЕУ за финансирање на Украина следната година ќе зависи од користењето на замрзнатите руски средства. Сè уште не е јасно дали Чешка, под новото раководство, ќе се противи на тој потег.

Формирањето на владата може да се соочи и со пречки. Мандатарот Бабиш би можел да се соочи со противење од претседателот Петер Павел поради именувањето на Турек, против кого беше водена полициска истрага поради контроверзни објави на социјалните мрежи. Турек за некои објави се извини, а за други негираше авторство.

Турек истакна дека Прага ќе биде „суверен, самоуверен член на ЕУ и цврст сојузник во НАТО“, но истовремено ќе „се спротивстави на понатамошното пренесување на овластувања на Брисел и ќе се залага за унија заснована на едногласност, заемна почит и прагматични политики.“

Поранешниот тркач со автомобили, кој до минатиот месец беше европратеник, ја градеше својата кампања на противење на Зелениот план. Еколошките политики ги нарече „неодржливи“ и повика да се укине забраната за продажба на автомобили со мотори на внатрешно согорување по 2035 година и целосно напуштање на системот за тргување со емисии.

„Вистинска промена бара од Брисел да им даде приоритет на фабричките постројки и семејните буџети наместо на идеолошки агенди што само го забрзуваат преносот на софистицираното европско производство во Кина“, изјави Турек. Додаде дека тамошните постројки и транспортот „генерираат поголеми глобални емисии, што парадоксално им противречи на самите климатски цели што Брисел тврди дека ги следи.“

Бабиш во наредните денови ќе мора да му го претстави списокот на министри на претседателот Павел, по што ќе следи гласање за доверба на новата влада.