Европската комисија денеска соопшти дека ги заострува правилата за визи за руските граѓани поради зголемени безбедносни ризици.
„Построги правила сега ќе важат за руските граѓани кои бараат визи за патување во Европската Унија. Патувањето и движењето во рамките на ЕУ е привилегија, а не нешто што се зема здраво за готово“, изјави високата претставничка за надворешна и безбедносна политика Каја Калас.
Руските граѓани повеќе нема да можат да добиваат визи со повеќе влезови, што значи дека ќе мора да аплицираат за нова виза секој пат кога планираат да патуваат во ЕУ.
Се воведуваат построги правила за да се намалат заканите за јавниот ред и внатрешната безбедност. Во исто време, се предвидуваат одредени исклучоци за независните новинари и бранителите на човековите права.
„Според новите правила, сите барања за визи од руските граѓани ќе бидат предмет на подобрени процедури за проверка и зголемено ниво на контрола. Ова ќе придонесе за интегритетот и безбедноста на Шенген зоната“, изјави комесарот за внатрешни работи Магнус Брунер.
Комисијата истакнува дека Русија, меѓу другото, ја користи миграцијата како оружје против ЕУ.
„Нелегалната инвазија на Русија во Украина создаде најопасната безбедносна средина во Европа во последните неколку децении. Сега се соочуваме со невиден упад на беспилотни летала и саботажи на наша територија. Наша должност е да ги заштитиме граѓаните на ЕУ“, рече Калас.
