Амбасадорите на земјите-членки на ЕУ денеска покренаа писмена постапка за продолжување на санкциите врз над 2.700 правни и физички лица одговорни за помагање на војната на Русија во Украина, изјави извор од ЕУ.
Списокот на правни и физички лица санкционирани од 2014 година порасна на над 2.700 имиња и мора да се ажурира на секои шест месеци. Без одлука за продолжување, „црната листа“ ќе престане да важи од утре, 15 март.
Владите на земјите-членки сега треба да потврдат пред крајниот рок дали го поддржуваат продолжувањето, а отсуството на одговор се смета за согласност. Одлуката се носи во последен момент поради противењето на Унгарија и Словачка, кои побараа некои руски олигарси да бидат отстранети од листата.
