Свирежите упатени кон потпретседателот на САД, Џеј Ди Венс, на Зимските олимписки игри во Италија се знак на „европска гордост“ по серијата критички коментари од американските претставници за Европа, изјави денеска шефицата за надворешна политика на ЕУ, Каја Калас.
Венс и неговата сопруга Уша беа исвиркани минатата недела на стадионот Сан Сиро во Милано кога накратко се појавија на голем екран за време на церемонијата на отворањето мавтајќи со американски знамиња, објави Politico.
На прашањето за исвиркувањето, Калас рече: „Би рекла дека слушнавме многу не баш убави зборови за Европа од Соединетите Американски Држави“. Таа додаде: „Секако, нашата јавност исто така има гордост, европска гордост. Тоа сега и се покажа“.
Коментарите ги одразуваат затегнатите односи меѓу ЕУ и САД пред Конференцијата за безбедност во Минхен (MSC) оваа недела, каде што европските лидери ќе се сретнат со членови на администрацијата на американскиот претседател Доналд Трамп. На минатогодишната конференција, Венс ги шокираше многу Европејци со своите остри критики кон ЕУ, обвинувајќи ја за задушување на слободата на говорот и загрозување на опстанокот на цивилизацијата преку миграцијата.
Венс и други претставници на администрацијата на Трамп продолжија да даваат потценувачки коментари, а потпретседателот неодамна ги обвини Европејците за двојни стандарди.
„Европејците се толку пријателски настроени во приватни разговори и подготвени да направат многу отстапки, а потоа јавно нè напаѓаат и велат: „Нема да работиме со Американците. Нема да правиме ништо со Американците“, рече Венс во интервју во саботата. „Жал ми е. Се е лага.“ Коментарите дојдоа откако Трамп се закани дека ќе го преземе Гренланд, самоуправна данска територија на Арктикот.
И покрај поканата, Венс не планира да присуствува на овогодинешната Минхенска безбедносна конференција, објавија Bloomberg и Fox News. На негово место, американската делегација на конференцијата ќе ја предводи американскиот државен секретар Марко Рубио, потврди претседателот на MSC, Волфганг Ишингер, пред новинарите во Берлин денеска.
