Многу Германци веруваат дека нивната земја не инвестира доволно во јавен превоз. Сепак, резултатите од една студија покажуваат дека економски и тоа како е оправдано да се инвестира во јавен превоз.
Имено, истражувањето, кое го спроведе консултантската фирма MCube на Техничкиот универзитет во Минхен во име на Германските железници (Deutsche Bahn), утврди дека едно евро инвестирано во автобуси, регионални возови или трамваи носи три евра за германската економија. Исто така, беше утврдено дека економското влијание на јавниот превоз изнесува дури 75 милијарди евра годишно, дека се создаваат работни места и се генерираат приходи на друго место.
Авторите на студијата истакнаа дека додадената вредност на јавниот превоз е веројатно многу поголема бидејќи неговите индивидуални ефекти не можат да се земат предвид од методолошки причини. Индиректната вредност создадена со инвестирање во јавен превоз се рефлектира во активностите што се поврзани со него. Тука спаѓаат производителите на возови, дистрибутерите на енергија и давателите на услуги за информатичка технологија (ИТ).
Вреди да се потсетиме дека добриот јавен превоз ја зголемува привлечноста на туризмот и привлечноста на бизнисите на пазарот на трудот. Само овој последен ефект на јавниот превоз сочинува една четвртина од неговата вкупна додадена вредност, како што заклучува студијата.
„Пред сè, заштедите се постигнуваат затоа што се намалува бројот на сообраќајни несреќи, количината на користено земјиште, бучавата, загадувањето на воздухот и емисиите на јаглерод диоксид (CO2). Доколку сегашните перформанси на јавниот превоз целосно се префрлат на приватен моторизиран превоз, годишно би се создавале дополнителни трошоци од девет милијарди евра“, нагласи коавторот на студијата и извршен директор на MCube, Оливер Меј-Бекман.
Сепак, истражувачите истакнаа дека добиените податоци имаат одредени недостатоци. Тие се однесуваат на 2019 година, односно периодот пред пандемијата на коронавирусот, а некои од нив се базираа на проценки, односно не се статистички засновани. Сепак, ова се објективни и методолошки конзистентни податоци, пишува tagesschau.
