Германија им порача на европските сојузници дека можат „да сметаат на неа“ откако Берлин објави големо зголемување на воените трошоци.
Претседателот Франк-Валтер Штајнмаер изјави дека Германија сака да стане „'рбет на европската одбрана“ во време кога руската агресија врз Украина продолжува.
„Ја примивме пораката, можете да сметате на нас. Ќе се стремиме Германија, нејзините вооружени сили и инфраструктура, да бидат 'рбет на конвенционалната одбрана во Европа“, рече Штајнмаер на церемонијата на НАТО во Брисел. Германија неодамна одобри планови за зголемување на буџетот за одбрана за 500 милијарди евра.
Зголемувањето на германските инвестиции во одбраната доаѓа во време кога европските земји сè повеќе ја преземаат одговорноста за сопствената безбедност.
Американскиот претседател Доналд Трамп постојано предупредува дека САД нема засекогаш да ја гарантираат безбедноста на Европа ако европските членки на НАТО не ги зголемат своите трошоци за одбрана, објави Reuters.
Според податоците на НАТО, Германија во последните години се соочува со критики за релативно ниските инвестиции во одбраната, и покрај нејзината економска сила. Новата стратегија, која вклучува модернизација на инфраструктурата и набавка на ново оружје, има за цел да ја исполни обврската за издвојување на 2 проценти од БДП за одбрана, за која сојузниците се согласија да ја поддржат во 2014 година.
