Грчките власти соопштија дека се откриени вредни артефакти од остатоците од бродот HMHS Britannic, повеќе од еден век откако сестринскиот брод на познатиот Titanic потона во Егејското Море за време на Првата светска војна, објавува BBC.
Иако операцијата за спасување беше спроведена во мај, веста беше објавена дури вчера, кога Министерството за култура откри детали за пронајдените предмети. Сложената операција за спасување ја спроведе тим од 11 професионални нуркачи, а проектот го организираше британскиот историчар Сајмон Милс, основач на Фондацијата Британик.
Mеѓу предметите извлечени на површината со воздушни перничиња се бродското ѕвонче за набљудување, навигациска светилка на левата страна од бродот, двоглед, керамички плочки од турските бањи и разновидна опрема од кабините од прва и втора класа.
Извлечените артефакти биле веднаш заштитени во контејнери и исчистени од морски организми, по што биле префрлени во Лабораторијата за подводни антиквитети во Атина, каде што ќе продолжи нивниот процес на конзервација. Вреди да се напомене дека некои од предметите идентификувани во оригиналниот план не можеле да се извлечат поради нивната лоша состојба и локација на бродоломот.
Откако ќе заврши работата, предметите ќе бидат изложени во новиот Национален музеј на подводни антиквитети во Пиреја, како дел од изложбата посветена на Првата светска војна.
Britannic бил третиот пароброд од класата Olympic на линијата White Star, придружувајќи се на познатите RMS Titanic и RMS Olympic. За време на војната, бродот бил преземен од Британската морнарица за да служи како болнички брод.
На 16 ноември 1916 година, Britannic наишол на германска мина во близина на грчкиот остров Кеа и потонал за помалку од еден час. Од 1.065 лица на бродот, 30 ги загубија животите кога двата чамци за спасување беа влечени во пропелерите на бродот, кои сè уште беа во функција.
