Портпаролот на иранското Министерство за надворешни работи, Есмаил Багеи, денес изјави дека иранскиот парламент подготвува закон за напуштање на Договорот за неширење на нуклеарно оружје (NPT), додавајќи дека Техеран останува против развојот на оружје за масовно уништување.
Тајната програма за збогатување на ураниум на Иран беше откриена во 2002 година, што предизвика загриженост дека се обидува да развие нуклеарна бомба, кршејќи ги своите обврски според NPT, што Техеран го негира.
Западните земји, предводени од САД, и Израел, најголемиот непријател на Иран, се сомневаат дека Техеран се обидува да произведе нуклеарно оружје. Техеран негира дека има такви воени амбиции, но во исто време потсетува и нагласува дека има право да користи нуклеарна енергија за цивилни цели во согласност со одредбите од NPT.
Сепак, Иран е единствената земја што нема нуклеарно оружје и збогатува ураниум до високо ниво од 60 проценти, според МААЕ.
Нуклеарните разговори меѓу Иран и САД закажани за недела во главниот град на Оман, Мускат, беа откажани откако Израел ја започна операцијата „Исправен лав“ во петокот наутро со ненадеен напад во кој беше елиминиран дел од военото раководство на Иран и беа оштетени нуклеарните објекти.
Израел изјави дека кампањата дополнително ќе се интензивира во наредните денови, а Иран вети дека ќе „ги отвори портите на пеколот“ како одмазда.
Иранскиот министер за надворешни работи, Абас Аракчи, изјави дека неговата влада не гледа смисла во продолжувањето на преговорите по големиот напад врз нуклеарните објекти на Иран.
Иран денеска ја повика Меѓународната агенција за атомска енергија (МААЕ) да го осуди Израел по нападот врз неговите нуклеарни објекти.
„Мировните нуклеарни објекти на земјата кои беа под постојан надзор на МААЕ беа нападнати. Очекуваме (агенцијата и нејзиниот раководител Рафаел Гроси) да заземат цврст став со кој ќе го осудат овој чин“ за време на вонредниот состанок денес, изјави портпаролот на иранското Министерство за надворешни работи, Есмаил Багаи.
