Соединетите Американски Држави дозволија истекување на отстапките со кое се ублажија санкциите врз руската нафтена индустрија, поради зголемувањето на цените на енергијата предизвикани од војната со Иран, објави германската новинска агенција dpa.
Во април, Министерството за финансии на САД издаде отстапки со кои се овластува испорака и продажба на сирова нафта и нафтени производи од руско потекло натоварени на бродови од 17 април. Отстапките истекоа во саботата, а до доцна вечерта не се појавија никакви изменети одлуки на веб-страницата на агенцијата.
Нафтениот сектор на Русија е цел на санкциите на САД со години. Со отстапките од април, Вашингтон се обиде да ги смири глобалните енергетски пазари. САД претходно одобрија слични отстапки кон средината на март, кои истекоа на 11 април.
Критичарите велат дека мерката ја зајакна Русија финансиски, а Кремљ ги користи приходите од нафта за финансирање на својата војна во Украина.
Демократските сенатори Џин Шахин и Елизабет Ворен во петокот ја повикаа администрацијата на Трамп да не ги продолжува отстапките.
„Министерството за финансии конечно мора да ја прекине својата лошо замислена политика за помагање на Русија да заработи уште повеќе пари од неодговорната војна на претседателот Трамп во Иран“, рекоа тие во заедничка изјава.
Сенаторите, исто така, забележаа дека нема знаци дека мерката ги намалува трошоците за американските семејства, наведувајќи ги растечките цени на бензинот во земјата.
Цените на бензинот во Соединетите Американски Држави значително се зголемија од почетокот на војната во Иран. Во саботата, Американците плаќаа во просек 4,52 долари за галон, според автомобилската асоцијација ААА. На почетокот на војната, која Соединетите Американски Држави и Израел ја започнаа кон крајот на февруари, просечната цена беше 2,98 долари за галон.
