Општите здравствени интереси на граѓаните се повредни од комерцијалните интереси на огласувачите, рече судот во Хаг, донесувајќи историска одлука за забрана на рекламирање на фосилни горива.
Холандскиот суд ја потврди забраната за рекламирање на фосилни горива во Хаг, во она што активистите го нарекуваат „историска одлука“ што би можела да ги охрабри другите градови да преземат слични мерки.
Со одлуката донесена во септември минатата година, Хаг стана првиот град во светот што законски забрани рекламирање на производи и услуги поврзани со фосилни горива, вклучувајќи автомобили на бензин, авионски патувања и крстарења.
Забраната стапи на сила на 1 јануари, но ANVR - холандското здружение на туристички агенции - и туристичката компанија TUI поднесоа тужби против одлуката, обидувајќи се да ја поништат.
Окружниот суд во Хаг пресуди во петок, 25 април, во корист на градот - прв пат суд разгледува и потврдува таква забрана за рекламирање на локално ниво.
„Ова е пробив за забраната за рекламирање на фосилни горива, како и за здравјето на луѓето и планетата“, рече Фемке Слехерс од Reclame Fossielvrij (Рекламирање без фосилни горива).
Додаде дека сега градовите низ целиот свет „можат да ги исчистат своите улици“ од реклами што ја промовираат климатската криза.
„Исто како што политиките против пушењето не успеваат да дадат резултати додека рекламирањето тутун е насекаде околу нас, така и климатската политика не може да биде ефикасна додека производите базирани на фосилни горива се промовираат на секој чекор“, додаде таа.
За време на прелиминарната постапка, судијата ги отфрли сите приговори на забраната.
Здружението ANVR и компанијата TUI тврдеа дека мерката го крши правото на слобода на говор и слобода на претприемништво. Тие, исто така, го оспорија тврдењето дека забраната ќе придонесе за намалување на емисиите на штетни гасови и истакнаа дека градската администрација нема овластување да воведе такви мерки.
Активистите се надеваат дека пресудата ќе предизвика верижна реакција во другите градови.
Пресудата од минатата недела дополнително го зацврсти преседанот што политичарите, експертите и климатските активисти сакаат да го видат во други средини.
„Оваа судска одлука е пресвртница. Таа покажува дека општините не се немоќни, туку имаат алатки за борба против климатската криза“, рече Роберт Баркер, заменик-градоначалник на Хаг од Партијата за животните.
Нагласи дека би било одлично кога многу градови низ целиот свет би го следеле овој пример и би придонеле за подобра и поодржлива иднина.
Џонатан Вајт, адвокат од организацијата за еколошки правни прашања ClientEarth, дели слично мислење.
„Градовите низ целиот свет би било мудро да ги следат стапките на Хаг и да воведат слични закони, за да воведат ера на намалена зависност од фосилни горива - со ветер во опашката што секако ја носи оваа пресуда“, рече тој.
📢Win for the climate📢
— ClientEarth (@ClientEarth) April 25, 2025
Today, the court ruled to uphold the Dutch city's landmark law, meaning that fossil fuel advertising in The Hague will continue to be unlawful, and setting a precedent for cities across Europe.
More: https://t.co/1wWyvs1q1j pic.twitter.com/UX1rtSFkgt
Генералниот секретар на Обединетите нации, Антониу Гутереш, претходно повика на глобална забрана за рекламирање на фосилни горива, по примерот на забраната за рекламирање на тутун, нарекувајќи ги нафтените компании „кумови на климатскиот хаос“.
Во 2022 година, Франција стана првата земја што воведе забрана за рекламирање на фосилни горива, иако во значително поблага форма - сè уште дозволувајќи реклами за природен гас и спонзорства на настани.
Како и Хаг, други градови и општини воведоа мерки за забрана на рекламирање на нафта, гас и јаглен.
На пример, рекламите за фосилни горива на одредени локации - вклучително и јавниот превоз - се забранети во Амстердам од 2021 година.
Минатата година, Градскиот совет на Единбург одлучи да забрани рекламирање на производи со висок јаглероден отпечаток на простори во сопственост на градот, како што се билборди и станици за јавен превоз.
