Советот на министрите на италијанската влада денеска прогласи петдневна национална жалост за смртта на папата Франциск.
Периодот на жалост почнува денес, потврдија владини извори, пренесува ANSA.
Советот на министрите денеска свика вонредна седница за да разгледа неколку прашања, вклучително и прогласување ден на жалост.
Папата Франциск почина во понеделникот во ватиканската резиденција „Санта Марта“ во 7:35 часот наутро од мозочен удар, проследен со кома и неповратен кардиоваскуларен колапс.
Погребот на папата Франциск ќе се одржи в сабота, 26 април, во 10 часот наутро на плоштадот пред базиликата „Свети Петар“, објави ANSA повикувајќи се на соопштението од Ватикан. За овој ден одлучено е да нема спортски активности, па сите напревари, вклучително и оние од популарната Серија А, се одложени и ќе се играат во други денови, најверојатно недела и понеделник.
Телото на папата Франциск моментно е изложено во капелата на резиденцијата „Санта Марта“, каде што тој живееше во текот на 12-те години додека беше на чело на Римокатоличката црква, објави Reuters.
На плоштадот „Свети Петар“ во Рим, денес, во 19:30 часот, ќе се одржи молитва предводена од деканот на Колеџот на кардиналите, кардиналот Џовани Батиста Ре.
