Израел му даде ново распетие на Либан место она што го уништи нивен војник

Израелската армија (ИДФ) објави дека, во координација со локалната заедница во градот Дебел во Јужен Либан, поставила ново распетие на местото на оштетеното кое претходно го уништи еден од нивните војници.

Во исто време, италијанските сили на УНИФИЛ ја обновија и уништената статуа на Исус Христос. Всушност, апостолскиот нунциј Паоло Борџа ја посети црквата во Дебел за да го благослови телото пред да биде поставено на крстот од страна на италијанските сили на УНИФИЛ.

ИДФ изјави дека Северната команда реагирала веднаш по добивањето на информациите за инцидентот и дека организирала замена на статуата во соработка со локалното население. Исто така истакнаа дека длабоко жалат за овој настан, со порака дека работат на тоа слични инциденти да не се повторат во иднина.

Потсетуваме, пред неколку дена еден израелски војник распореден на југот на Либан објави фотографија на која се гледа како руши статуа на Исус Христос, што предизвика бурни реакции од католичката заедница во таа земја. На фотографијата се гледа како статуата била соборена на земја, по што војникот дополнително ја оштетил со чекан.

Иако Израелските одбранбени сили првично ја негираа автентичноста на снимката, наведувајќи дека постои можност да станува збор за фотомонтажа, подоцна потврдија дека фотографијата е автентична.

„По завршувањето на почетниот преглед во врска со фотографијата објавена претходно денеска на која се гледа војник од ИДФ кој оштетува христијански симбол, беше утврдено дека фотографијата прикажува војник од ИДФ кој дејствува во Јужен Либан“, соопшти израелската војска.

Додадоа дека таквото однесување не е во согласност со вредностите што ги негува ИДФ.

„ИДФ го гледа инцидентот со голема сериозност и нагласува дека однесувањето на војниците е целосно спротивно на вредностите што се очекуваат од нивните војници. Инцидентот го истражува Северната команда и моментално се решава преку командниот синџир. Ќе бидат преземени соодветни мерки против вклучените лица во согласност со наодите“, истакнаа Израелците.

Осуда стигна и од израелскиот премиер Бенјамин Нетанјаху.

ИДФ, исто така, соопшти дека нивните операции во Јужен Либан имаат за цел демонтирање на инфраструктурата воспоставена од Хезболах и дека немаат намера да им наштетат на цивилни објекти, вклучително и религиозните симболи и предмети.