Израел нападна 100 локации во Либан за 10 минути, стотици мртви и ранети

Стотици луѓе се убиени и ранети во израелските напади врз Либан, изјави либанскиот министер за здравство, според државната новинска агенција.

Министерот за здравство Ракан Насередин изјави дека имало „стотици мртви и ранети“ по нападот во среда, објави NNA.

Нападите вклучуваат едни од најобемните израелски напади во центарот на Бејрут во последните децении. Воздушните напади погодија најмалку три области во центарот на Бејрут, вклучувајќи и еден напад во близина на централното крајбрежно шеталиште, според видео анализа на CNN.

Градот Бејрут, кој е претежно сунитски и христијански, ретко е цел на израелски напади.

Дописник на AA изјави дека нападите биле насочени кон станбени области со сунитско мнозинство, што значи дека тие се надвор од областите контролирани од Хезболах.

Друго видео покажува полусрушена зграда во западен Бејрут, од која густи облаци од црн чад се креваат кон небото. Сирените за итни случаи се огласуваат речиси без престан од почетокот на нападите, објавија новинарите на CNN на терен.

Израелската армија нападна повеќе од 100 локации „во рок од десет минути“ во Либан, во најголемиот координиран напад од почетокот на тековната офанзива во таа земја, објави армијата во среда, пренесува Анадолу.

Во военото соопштение се вели дека нападите биле насочени кон локации поврзани со Хезболах во повеќе области, вклучувајќи ги Бејрут, долината Бека и јужен Либан.

Војската тврди дека целите вклучувале командни и контролни центри и друга инфраструктура што се користи за извршување напади врз израелски цели.

Хезболах сè уште не ги коментирал тврдењата на Израел.

Либанскиот премиер Наваф Салам ги повика „сите пријатели на Либан“ да ги запрат израелските воени акции во земјата „со сите расположливи средства“ по големиот бран воздушни напади.

Во објава на социјалните медиуми, Салам напиша: „Израел продолжува да ги проширува своите напади што погодија густо населени станбени области, убивајќи невооружени цивили во различни делови на Либан, особено во главниот град Бејрут“.

Неговиот апел уследи по соопштението на израелската војска (IDF), која објави дека ги извршила „најголемите напади“ низ Либан од почетокот на операцијата против Хезболах.

Салам рече дека постапките на израелската војска покажуваат „целосно непочитување“ на меѓународното право, додавајќи: „Сите пријатели на Либан се повикани да ни помогнат да ги запреме овие напади со сите расположиви средства“.

Нападите се случија неколку часа откако САД и Иран објавија двонеделно примирје во вторник, со цел да се отвори патот за конечен договор за прекин на војната што Вашингтон и Тел Авив ја започнаа против Техеран на 28 февруари, во која загинаа и беа повредени илјадници.

Пакистанските медијатори рекоа дека прекинот на огнот го вклучува Либан, додека израелскиот премиер Бенјамин Нетанјаху рече дека не го вклучува.

Хезболах досега се придржуваше до прекинот на огнот и покрај континуираните израелски напади.

Либанските медиуми објавија дека најмалку осум лица се убиени, а 22 се ранети во израелскиот напад врз јужниот град Сидон во среда, по прогласувањето на прекин на огнот.

Израел изврши воздушни напади и копнена офанзива во јужен Либан по прекуграничниот напад на Хезболах на 2 март, и покрај прекинот на огнот што стапи на сила во ноември 2024 година.

Либанските власти објавија дека од тогаш најмалку 1.530 луѓе се убиени, а 4.812 се ранети во израелските напади.