Ким Џонг Ун го шири нуклеарниот арсенал, се пофали со тајна централа

Лидерот на Северна Кореја, Ким Џонг Ун, повика на „експоненцијално“ проширување на атомскиот арсенал на земјата за време на посетата на нов погон за производство на нуклеарен материјал, објави државниот медиум KCNA.

Ким рече дека производствениот капацитет за нуклеарен материјал за оружје се зголемил повеќе од двојно во последните пет години и им нареди на службениците дополнително да го зголемат производството за да се постигнат долгорочните стратешки цели.

За време на посетата, тој беше информиран за новите производствени процеси што вклучуваат понапредна технологија и ги разгледа тековните производствени цели и идните планови, објави KCNA.

Фотографиите објавени од државните медиуми го покажаа Ким како оди меѓу редови цилиндрична опрема во објектот, што според некои аналитичари би можело да укажува дека локацијата е во главниот нуклеарен комплекс на земјата во Јонгбјон.

Ким рече дека проширувањето е неопходно со оглед на она што тој го нарече влошување на безбедносните закани и долгорочен конфликт со „најжестоките непријатели“ и ја потврди политиката на земјата за зголемување на нуклеарното одвраќање.

KCNA објави дека истиот ден се одржал клучен консултативен состанок за зајакнување на нуклеарните сили, на кој Ким ги изложил насоките за забрзување и на квалитативното и на квантитативното проширување на нуклеарниот арсенал на Северна Кореја. Земјата ги утврдила редоследот и заштитните мерки за спроведување на „амбициозен иден план дизајниран да ги зајакне нуклеарните сили на нашата земја со експоненцијална брзина“, го цитирала KCNA Ким.

„Ова е историски настан што постави епохална пресвртница во брзиот напредок на нашите нуклеарни капацитети“, додаде тој.

Нуклеарниот објект што го откри Северна Кореја бил објект за збогатување на ураниум, изјавил претставник на јужнокорејскиот Заеднички штаб на вооружените сили на Јужна Кореја на брифинг во Сеул. 

Аналитичарите рекле дека посетата на Ким се чини дека имала за цел зајакнување на преговарачката позиција на Северна Кореја пред потенцијален дипломатски ангажман, а воедно и оправдување на забрзувањето на нејзината нуклеарна програма.

Со оглед на тоа што залихите од збогатен ураниум на Иран се клучна пречка во тековните разговори меѓу Иран и САД, се чини дека Пјонгјанг „намерно ги прикажува“ своите растечки нуклеарни капацитети за да сигнализира дека денуклеаризацијата не е прашање за кое може да се преговара со Вашингтон, забележува Јанг Му-џин, поранешен претседател на Универзитетот за севернокорејски студии.

Пјонгјанг се повлече од Договорот за неширење на нуклеарно оружје во 1993 година и оттогаш спроведе шест нуклеарни тестови, како и десетици тестови на балистички ракети, од кои некои експерти велат дека би можеле да стигнат до САД.

Воената програма ја подложи Северна Кореја на строги санкции од САД. Отпорувајќи се на притисокот од САД и нивните сојузници, Пјонгјанг во 2022 година прогласи дека нејзиниот статус како нуклеарна сила е „неповратлив“. 

Земјата го смета својот нуклеарен арсенал, проценет на неколку десетици боеви глави, како спас против секој обид за инвазија на нејзина територија или соборување на нејзиниот режим.

Северна Кореја спроведе осум ракетни тестови оваа година, што аналитичарите велат дека би можеле да ги одразат напорите на Пјонгјанг да ја искористи ерозијата на меѓународните норми за да го зацврсти својот нуклеарен статус.