Иако европските претставници инсистираат дека ова не е политичко признавање на режимот, самиот факт што состаноците со талибанците* се организираат во срцето на европските институции покажува колку прашањето за миграцијата станало приоритет за европските влади.
Европската Унија планира да покани во Брисел претставници од талибанската влада во Авганистан на нивната прва позната официјална посета за да разговараат за миграциската политика и депортацијата на авганистанските граѓани, отворајќи ново поглавје во комплицираните односи меѓу ЕУ и властите во Кабул откако талибанците се вратија на власт во 2021 година.
Се очекува делегацијата да ја предводи Абдул Кахар Балхи, портпарол на Министерството за надворешни работи на талибанците и еден од највидливите претставници на талибанската администрација во меѓународните контакти. Балти често се појавуваше во странските медиуми во последните години и разговараше со меѓународните партнери за санкциите, хуманитарната помош и прашањата за миграцијата.
Европската комисија потврди дека поканата е упатена до „де факто властите“ на Авганистан, нагласувајќи дека разговорите ќе бидат од чисто техничка природа.
Организацијата на состанокот е координирана од Генералниот директорат за миграција и внатрешни работи (DG HOME) на Европската комисија и шведското Министерство за правда, со поддршка на белгиските власти, кои, според европските медиуми, ги иницирале разговорите поради растечкиот притисок врз европскиот миграциски систем.
Се очекува состаноците да се одржат во Брисел во текот на јуни, но не во просториите на европските институции, туку на неутрална локација како што е хотел или конференциски центар.
Притоа, ЕУ се обидува да го избегне впечатокот за формално легитимирање на талибанската влада, која ниту една земја-членка официјално не ја признала.
Европските претставници во последните месеци ги интензивираат дискусиите за враќање на одбиените баратели на азил во нивните земји на потекло, вклучително и Авганистан, што досега беше речиси невозможно поради недостаток на дипломатски канали со Кабул. Во исто време, организациите за човекови права предупредуваат дека секоја соработка со талибанците би можела да ги поткопа европските принципи за заштита на човековите права, особено правата на жените и политичките дисиденти во Авганистан, пишува Euractiv.
Сепак, во Брисел расте мислењето дека Европската Унија мора да најде прагматичен пристап за да ја одржи контролата врз миграциската политика и да спречи нови бранови мигранти. Затоа претстојните разговори со претставниците на талибанците претставуваат политички чувствителен тест за европската дипломатија, рамнотежа помеѓу принципите и реалполитиката.
Талибанците се исламистичко политичко и милитантно движење во Авганистан кое се појави во раните 90-ти и моментално ја контролира земјата како де факто влада во Кабул. Тие прв пат владееја со Авганистан од 1996 до 2001 година, кога беа соборени од власт со меѓународна интервенција предводена од САД, а се вратија на власт во август 2021 година по повлекувањето на странските сили и падот на претходната влада.
Нивниот политички систем не е меѓународно признат, но тие управуваат со државните институции и ги спроведуваат своите закони и административни правила. Делегациите што учествуваат во меѓународните разговори, вклучително и оние во Брисел, доаѓаат од оваа централна администрација во Кабул, иако талибанците остануваат меѓународно изолирани.
Во рамките на движењето постојат различни внатрешни крила и позиции, но тие функционираат во рамките на една структура и не дејствуваат како посебни политички организации. Затоа, во дипломатската пракса, се третираат како единствен орган, а не како повеќе посебни талибански фракции.
*Талибанците се пишуваат со мала буква бидејќи не странува збор за етничка или национална група туку за политичко-религиозно движење. Исто како што републиканците и демократите од САД се пишуваат со мала буква.
