Од раните утрински часови, германската полиција спроведува една од најголемите операции во историјата против озлогласената моторџиска група Hells Angels.
Дури 1.200 полицајци, вклучувајќи и специјални единици, учествуваат во операцијата во покраината Северна Рајна-Вестфалија. Како што објави Министерството за внатрешни работи во Диселдорф, здружението Hells Angels Motorcycle Club Leverkuzen официјално доби забрана за работа непосредно пред почетокот на рацијата.
Ова е една од најголемите мерки против бајкерскиот криминал во оваа германска покраина. Домовите и бизнисите на осомничените членови и нивните поддржувачи се претресуваат во 28 градови.
Полицијата, меѓу другите, ги таргетирала Келн, Дортмунд, Дуизбург, Бохум, Билефелд и Леверкузен, додека клубот Hells Angels во Хилден е исто така под опсада.
Покрај потрагата по материјални докази, полицијата е фокусирана и на конфискација на нелегално стекнат имот. За потсетување, скапи мотоцикли и големи количини готовина редовно беа запленети во претходни слични операции.
Операцијата ја води полицијата од Диселдорф во соработка со Специјалното обвинителство за борба против организираниот криминал (ZeOS NRW). Истрагата беше покрената поради сомневање за основање и членство во криминална организација.
Ова не е првпат германските власти да преземат мерки против оваа група. Во претходните години, беа забранети и други ограноци, како што е Hells Angels MC Concrete City во 2017 година, што беше потврдено од судот четири години подоцна.
Сепак, Hells Angels неодамна станаа уште посилни во овој дел од Германија. Според полициските податоци, тие неодамна имале 29 ограноци со 469 членови, а нивниот број нагло се зголемил откако им се придружиле бројни пребегнати од соперничката група Bandidos. Ова ги направи Hells Angels повторно најголемата моторџиска група во Северна Рајна-Вестфалија.
