Орбан ѝ постави ултиматум на Украина: Имате три дена

Унгарија ќе го прекине транзитот на клучни стоки наменети за Украина доколку Киев не ги продолжи испораките на нафта преку нафтоводот Дружба во рок од три дена, се закани премиерот Виктор Орбан. Заканата доаѓа во услови на сè поголеми тензии меѓу Киев и Будимпешта, една од владите на ЕУ кои се најпромосковски ориентирани, поради прекинот на транзитот на руска нафта до Унгарија, пишува The Kiev Independent.

„Веќе ги прекинавме испораките на бензин и дизел до Украина. Засега сè уште им испраќаме електрична енергија, но ќе го запреме и транзитот на стоки клучни за Украина што минуваат низ Унгарија“, изјави Орбан за Kossuth Radio.

Нафтоводот Дружба, кој ги снабдува Унгарија и Словачка со руска сирова нафта преку украинска територија, е надвор од употреба од крајот на јануари. Според Киев, причината е рускиот напад што ја оштети енергетската инфраструктура на западот од Украина.

Сепак, Будимпешта и Братислава тврдат дека имаат докази дека нафтоводот е во функција и побараа инспекција. Украинскиот претседател Володимир Зеленски изјави дека ќе го разгледа барањето доколку биде официјално испратено.

Службеникот на унгарското Министерство за енергетика, Габор Чепек, побара од Украина да го рестартира Дружба во рок од три работни дена или да им овозможи пристап на унгарските инспектори. Зеленски процени дека поправката на нафтоводот ќе трае до месец и половина, но не изрази поддршка за негово обновување.

Спорот меѓу двете земји достигна ново ниво синоќа, кога Будимпешта притвори седум вработени во украинската државна банка кои транспортирале готовина и злато низ Унгарија. 

Украинскиот министер за надворешни работи Андриј Сибига рече дека вработените биле земени како „заложници“ додека ги извршувале своите должности и побара нивно итно ослободување.

Унгарските власти го поврзаа нивното притворање со сомневања за перење пари, по што најавија нивна депортација. Украина го осуди потегот како „државен тероризам“ и „земање заложници“, заканувајќи се со контрамерки во форма на санкции.

На овие настани им претходеше предупредувањето на Орбан дека ќе употреби „политички и финансиски алатки“ за да го „присили“ повторното отворање на гасоводот. Аналитичарите ја поврзуваат неговата конфронтациска реторика кон Украина со претстојните парламентарни избори во Унгарија во април, на кои владејачката партија Фидес заостанува зад опозициската партија Тиса според анкетите.

Зеленски, од друга страна, навести дека ќе побара од украинската армија да разговара со Орбан „на нивниот јазик“, што некои го протолкуваа како закана за унгарскиот лидер.