По серија американски напади се урна кулата од која Иран го контролираше поморскиот сообраќај

Американскиот министер за одбрана Пит Хегсет објави фотографија на која се гледа уривањето на кула по серија напади врз Иран. Иако Хегсет не ја прецизираше локацијата, Associated Press објави дека се случила во пристаништето Чабахар. Иранските државни медиуми потврдија трета серија напади врз пристанишниот објект, но првично не соопштија дека кулата се урнала.

Техеран тврди дека урнатата структура се користела за следење на комерцијалниот сообраќај во пристаништето. Од друга страна, познато е дека Иранската револуционерна гарда работи во пристаништата низ целата земја.

Чабахар е цел на повторени напади во последните денови, бидејќи конфликтот се прошири надвор од воените цели на клучна логистика и поморска инфраструктура. Локацијата на пристаништето во Оманскиот Залив го прави стратешки важен бидејќи овозможува директен пристап до Арапското Море и целосно го заобиколува Ормускиот Проток, еден од најпрометните енергетски транспортни правци во светот.

Конфликтот дополнително ескалираше откако Техеран утрово објави дека започнува нов бран напади врз американските воени објекти во Персискиот Залив. Иранскиот одговор дојде откако американските сили нападнаа воени цели во Иран шеста ноќ по ред. Со ова беше прекршено примирјето минатиот месец и конфликтот продолжи со секојдневни меѓусебни напади.