Иранската новинска агенција فارس (Фарс) објави детали од предложениот план за прекин на огнот од 10 точки на Техеран, кој ќе биде основа за преговорите со Соединетите Американски Држави во Исламабад.
Американскиот претседател Доналд Трамп утрово објави дека САД и Иран постигнале договор за двонеделен прекин на огнот по повеќе од еден месец борби.
„Добивме предлог од 10 точки од Иран и веруваме дека тоа е функционална основа за преговори. Речиси сите точки за кои претходно не се согласувавме веќе се договорени меѓу САД и Иран, но двонеделниот период ќе овозможи договорот да се финализира и заклучи“, рече Трамп.
Предлогот на Иран од 10 точки за прекин на огнот вклучува следново:
- Гаранција дека Иран нема повторно да биде нападнат.
- Траен крај на војната, а не само привремен прекин на огнот.
- Прекин на израелските напади во Либан.
- Укинување на сите санкции на САД против Иран.
- Прекин на сите регионални конфликти насочени против сојузниците на Иран.
- Повторно отворање на Ормускиот Проток за поморски сообраќај.
- Воведување такса од 2 милиона долара по брод што поминува низ Ормускиот Проток.
- Иран ќе ги дели приходите од таксите со Оман.
- Иран ќе воспостави правила за безбеден премин низ Ормускиот Проток.
- Иран ќе ги користи приходите од Ормускиот Проток за реконструкција, наместо репарации.
Според иранските медиуми, Иран ќе прифати крај на војната само откако ќе се финализираат деталите во согласност со мировниот план од 10 точки, наводно доставен до Белата куќа преку пакистански медијатори.
Во верзијата објавена на персиски јазик, Иран ја вклучи и фразата „прифаќање на збогатување на ураниум“ за својата нуклеарна програма. Но, од причини што остануваат нејасни, фразата недостасуваше од англиските верзии што иранските дипломати им ги дистрибуираа на новинарите.
Примирјето дојде во последните моменти пред рокот што го постави Трамп за отворање на протокот. Во случај да не се постигне договор, американскиот претседател објави дека ќе ги интензивира нападите, дури и до точка на „бришење на цивилизацијата“.
Откако Трамп го објави прекинот на огнот, Израел издаде соопштение во кое се вели дека ја поддржува одлуката на Трамп да ги суспендира нападите врз Иран на две недели. Исто така, објави дека прекинот на огнот не го вклучува Либан.
„Израел ја поддржува одлуката на претседателот Трамп да ги суспендира нападите врз Иран две недели, под услов Иран веднаш да го отвори протокот и да ги запре сите напади врз САД, Израел и земјите во регионот“, рекоа Израелците.
