Високиот руски функционер, Константин Кошачов, порача дека заканите од американскиот претседател, Доналд Трамп, за 100% царини воопшто не влијаат врз ставот на Москва.
„Тоа не нѐ допира ни најмалку“, изјави потпретседателот на Горниот дом на рускиот Парламент.
„Ако тоа беше сè што Трамп денес имаше да каже за Украина, тогаш целиот притисок испари“, додаде Кошачов.
Тој тврди дека Европа сега ќе мора сѐ повеќе да плаќа, бидејќи бесплатниот ручек за нив се покажа како замка. Дополнително, ги обвини САД дека се единствениот вистински добитник од новата политика, затоа што американската воена индустрија профитира.
„Украина може да продолжи да води војна до последниот Украинец“, изјави Кошачов, заклучувајќи: „За 50 дена многу може да се смени – и на бојното поле и во расположението на оние кои носат одлуки во САД и НАТО.“
Трамп вчера најави нов пакет воена помош за Украина, кој ќе се реализира преку модел во кој САД го произведува и продава оружјето на земјите-членки на НАТО, а тие потоа го испраќаат во Киев. Тој нагласи дека Украина итно има потреба од опрема и дека САД ќе ѝ испорачаат „најмодерно оружје“, додека европските земји ќе ги покријат сите трошоци.
Истовремено, Трамп се закани со воведување на 100% царини за Русија ако во рок од 50 дена не прифати договор за завршување на војната. Најави и т.н. секундарни санкции за сите земји кои ќе продолжат да купуваат руска нафта, што подоцна го потврди и Белата куќа.
