Русија започна нови напади со балистички ракети врз Киев и други големи украински градови, соопштија украинските власти, додавајќи дека најмалку 5 лица се убиени, а 20 повредени само во градот Запорожје.
Шефот на регионалната воена администрација, Иван Федоров, рано утрово на Telegram објави дека индустриските објекти и инфраструктурата се погодени во Запорожје. Според првичните информации, едно лице е повредено во Киев. Градоначалникот Виталиј Кличко рече дека експлозии се слушнале во главниот град и ги повика жителите да останат во засолништа додека службите за итни случаи одат на терен, пишува dpa.
По повеќе од четири години војна, Украина се соочува со недостиг од пресретнувачки ракети за воздушна одбрана, што ѝ овозможи на Русија да ја интензивира употребата на балистички ракети против Киев и други градови. Американските системи Patriot се сметаат за меѓу најефикасните средства за одбрана од балистички ракети, кои се особено тешки за пресретнување поради нивната голема брзина.
Украина има неколку системи Patriot, но нема доволно пресретнувачки ракети. Властите во Киев стравуваат дека во текот на претстојната зима, Русија повторно би можела сериозно да ја оштети инфраструктурата на земјата со ракетни напади и дополнително да ги влоши условите за живот на милиони Украинци.
