Руското Министерство за одбрана вчера објави список на европски компании за кои тврди дека произведуваат дронови за Украина, а висок функционер на Кремљ веднаш ги нарече потенцијални воени цели. Листите беа објавени на 15 април и ги вклучуваат имињата и адресите на производители од голем број европски земји, објавува Meduza.
Едниот список, насловен како „Подружници на украински компании во Европа“, наведува 11 компании во градови како Лондон, Минхен, Рига, Вилнус и Прага. Вториот, насловен како „Странски компании што произведуваат компоненти“, наведува 10 компании, од кои некои се наоѓаат во Мадрид, Венеција и Хаифа.
Интересно е што читател на порталот Meduza забележал дека првиот список ја вклучувал адресата Лерхенауер Штрасе 28 во Минхен, која се покажа дека припаѓа на станбена зграда.
Руското министерство соопшти дека листите се објавени за европските граѓани „да ги разберат вистинските причини за заканите по нивната безбедност“, но и за да ги знаат адресите на „украинските“ и „заедничките“ компании што произведуваат дронови за Украина на нивна територија.
Дмитриј Медведев, заменик-шеф на Рускиот совет за безбедност, го коментираше објавувањето на социјалната мрежа X, нарекувајќи го „список на потенцијални мети за руските вооружени сили“. „А дали овие напади ќе станат реалност зависи од тоа што следи. Спијте мирно, европски партнери!“, додаде тој.
Russian Defense Ministry’s statement must be taken literally: the list of European facilities which make drones & other equipment is a list of potential targets for the Russian armed forces. When strikes become a reality depends on what comes next. Sleep well, European partners!
— Dmitry Medvedev (@MedvedevRussiaE) April 15, 2026
Овој потег на Москва дојде еден ден откако украинскиот претседател Володимир Зеленски се сретна со германскиот канцелар Фридрих Мерц во Берлин. Пред средбата, како што објави кабинетот на Зеленски, на двајцата лидери им беа презентирани седум модели на дронови произведени од заеднички украинско-германски компании.
Истиот ден, Германија и Украина се согласија за пакет за одбрана вреден четири милијарди евра. Според договорот, Германија ќе финансира договор за купување на неколку стотици ракети за системите за воздушна одбрана Patriot.
