Руската државна нуклеарна корпорација „Росатом“ останува во Иран и покрај конфликтот на Блискиот Исток и е посветена на спроведување на договорот за изградба на уште две единици во нуклеарната централа Бушер, потврди во четврток нејзиниот раководител Алексеј Лихачев.
„Росатом“, кој ја изгради првата единица од единствениот нуклеарен објект во Иран, евакуираше дел од својот персонал и ги прекина градежните работи на новите објекти откако САД и Израел започнаа напади врз Иран на 28 февруари, објави Reuters.
Лихачев објасни дека околу 450 вработени во „Росатом“ сè уште се на локацијата, откако 150 од нив се вратија во Русија преку Ерменија оваа недела. Тој исто така рече дека ситуацијата околу Бушер останува напната, но нагласи дека немало напад ниту врз самата централа ниту врз градилиштето.
„Изградбата на вториот и третиот блок останува еден од приоритетите на корпорацијата. Ова сигурно не е време за заминување. Настаните на Блискиот Исток се само дел од глобалниот мозаик“, ја пренесе „Росатом“ изјавата на Лихачов.
Меѓудржавниот договор меѓу Русија и Иран дозволува изградба на до осум нуклеарни блокови, од кои четири се планирани во Бушер.
Минатата есен, Иран објави дека потпишал договор од 25 милијарди долари со Росатом за изградба на четири нуклеарни единици со вкупен капацитет од 5 гигавати на друга локација на југоистокот на земјата. Двете страни потпишаа и меморандум за развој на мали нуклеарни централи во Иран.
