Се урна мал авион со европски туристи во Кенија, нема преживеани

Мал авион се урна рано утрово во крајбрежниот регион Квале во Кенија додека летал кон националниот резерват Маaсаи Мара. Загинаа сите 11 лица во авионот.

Кениската авиокомпанија Mombasa Air Safari објави дека 11 лица, меѓу кои 8 унгарски и 2 германски патници, и полотот кениски државјанин, загинале во авионската несреќа што се случи денес.

Властите соопштија дека несреќата се случила во ридско и шумско подрачје на 40-ина километри од аеродромот „Дијани“.

Стивен Оринде, комесар на округот Квале, изјави за Associated Press дека операциите на местото на несреќата се во тек и дека повеќе детали ќе бидат објавени подоцна.

Кениската Управа за цивилно воздухопловство соопшти дека во авионот имало 11 лица и дека властите ја истражуваат причината за несреќата.

Локалните власти и спасувачките екипи моментно работат на пронаоѓање на телата и причината за авионската несреќа, а Управата за цивилно воздухопловство на Кенија објави почеток на истрага за инцидентот. Досега не е објавено точно каде се урнал авионот, ниту под какви околности се случила трагедијата.

Управата за цивилно воздухопловство на Кенија (KCAA) потврди дека авионот со регистрациски број 5Y-CCA на пат од Дијани до Кичва Темба се урнал во 5:30 часот по локално време.

Националниот резерват Маасаи Мара, кон кој се упатил авионот, е популарна туристичка дестинација, позната во целиот свет по годишната миграција на гнуа од Серенгети во соседна Танзанија.

Компанијата Mombasa Air Safari е специјализирана за туристички и чартер-летови во Источна Африка, објави Reuters.