Елекетричната енергија е обновена речиси целосно низ Шпанија и Португалија по вчерашниот масовен прекин што предизвика хаос во двете земји.
„Електричната енергија е обновена речиси целосно низ цела Шпанија по големиот прекин, при што околу 99,16% од снабдувањето со електрична енергија е обновено до 6 часот наутро“, соопшти утрово операторот на електричната мрежа Red Eléctrica.
И во соседна Португалија електричната енергија е обновена во повеќето домаќинства. „Околу 95% од 6,5 милиони корисници во земјата се вратија на мрежата“, објави операторот на електричната мрежа RTP.
Официјалната причина за прекинот сè уште не е позната. Милиони луѓе во Шпанија и Португалија останаа во темница откако одеднаш снема струја, комуникациските мрежи беа прекинати, семафорите престанаа да работат, а лифтовите беа блокирани.
Шпанскиот премиер, Педро Санчес, во телевизиско обраќање вчера вечерта, вети дека струјата ќе биде обновена до вторник. Не ја прецизираше причината за прекинот, но рече дека не се исклучува ниедна можност.
Синоќа португалскиот оператор на електричната мрежа REN објави дека прекинот бил предизвикан од дефект во шпанската електрична мрежа, поврзан со „редок атмосферски феномен“.
