Сирија ќе се приклучи на меѓународната коалиција против Исламска Држава (ИСИС) предводена од САД, изјави во понеделник американски функционер под услов да остане анонимен, а информацијата ја потврди и сирискиот министер за информации, Хамза ал-Мустафа.
„Сирија со тоа ќе стане 90-тата членка на коалицијата против Исламска Држава, здружувајќи ги силите со САД за елиминирање на последните упоришта на ИСИС и запирање на приливот на странски борци“, рече американскиот функционер.
Хамза ал-Мустафа изјави на социјалната мрежа X дека Сирија потпишала документ за политичка соработка со меѓународната коалиција.
„Договорот е политички и засега не содржи воени компоненти“, додаде сирискиот министер за информации.
Претседателот Трамп во понеделникот во Белата куќа го пречека сирискиот претседател Ахмед ал-Шараа, поранешен член на Ал Каеда чии исламистички борци го соборија долгогодишниот сириски претседател Башар ал-Асад во декември.
Ал-Шараа стана првиот сириски претседател кој беше примен во Белата куќа. Откако ја презеде функцијата, Сирија се дистанцира од клучните сојузници на Асад, Иран и Русија, и се сврте кон соработка со Турција, земјите од Персискиот Залив и Вашингтон.
„Соединетите Американски Држави ќе ѝ дозволат на Сирија да продолжи со операциите во својата амбасада во Вашингтон за да ја зајакне координацијата во борбата против тероризмот, безбедноста и економските прашања“, изјави анонимен американски функционер.
