По 34 години, топењето на глечерите во Швајцарските Алпи конечно ја откри судбината на двајца белгиски алпинисти кои исчезнаа додека се искачувале на Вајсмис. Нивните останки беа пронајдени на глечерот Трифт, а нивниот идентитет беше потврден со ДНК анализа.
Останките на двајца белгиски алпинисти кои исчезнаа пред 34 години се пронајдени на глечерот Трифт во швајцарските Алпи. Полицијата во среда соопшти дека телата се извлечени од глечерот кој брзо топи.
Човечките останки биле пронајдени од планинар на 26 јули во Јужна Швајцарија, во близина на границата со Италија. Телата потоа биле префрлени во Институтот за судска медицина во Сион, каде што била извршена идентификација.
Во соопштението од полицијата на кантонот Вале се наведува дека со директна споредба на ДНК профилите официјално е потврдено дека станува збор за двајцата планинари што исчезнале во областа Вајсмис во 1992 година.
На 4 септември 1992 година, двајцата мажи тргнале од планинскиот дом Вајсмис со цел да се искачат на истоимениот врв, кој е висок 4.017 метри.
Стигнале до колибата Алмагел, но во нивното искачување биле запрени од ненадејно влошување на времето. Во месеците по нивното исчезнување, биле организирани неколку потраги, но бил пронајден само нивен ранец.
Забрзаното топење на глечерите, поврзано со климатските промени, сè повеќе ги изнесува на површина остатоците од планинари кои исчезнале пред децении.
Минатата година, на глечерот Обер Габелхорн, исто така во кантонот Вале, беа пронајдени останки од швајцарски планинар кој исчезнал во 1994 година.
Полицијата во кантонот Вале води евиденција за исчезнати лица од 1925 година, а повеќето случаи се поврзани со несреќи во планините и на реките.
