Додека во Пекинг се одржуваше голема воена парада каде што Кина презентираше ново оружје, американскиот претседател Доналд Трамп објави порака на својата социјална мрежа преку која ги поздрави и ги обвини за заговор, кинескиот претседател Си Џинпин, рускиот претседател Владимир Путин и севернокорејскиот лидер Ким Џонг Ун, кои беа заедно на парадата.
„Големото прашање е дали претседателот Си од Кина ќе ја спомене огромната поддршка и 'крв' што Соединетите Американски Држави ѝ ја дадоа на Кина за да помогнат во обезбедувањето на СЛОБОДАТА од многу непријателски странски напаѓач. Многу Американци загинаа во потрагата на Кина по Победа и Слава. Се надевам дека ќе бидат соодветно почитувани и запомнети по нивната храброст и жртва“, напиша Трамп.
„Нека претседателот Си и прекрасниот народ на Кина имаат голем и траен ден на прослава. Ве молам, пренесете ги моите најтопли поздрави до Владимир Путин и Ким Џонг Ун додека заговарате против Соединетите Американски Држави“, додаде тој.
Коментарите на Трамп дојдоа додека Си Џинпин разговараше со 26 светски лидери, вклучувајќи ги Путин и Ким, за „незапирлива“ Кина која „никогаш нема да биде заплашена од насилници“. Парадата беше искористена и за да се претстави нова генерација оружје, вклучувајќи нуклеарни ракети, ласерски системи и поморски беспилотни летала.
