Американскиот претседател Доналд Трамп денеска изјави дека наскоро „нешто ќе се случи“ во Украина, но дека рускиот претседател Владимир Путин и украинскиот претседател Володимир Зеленски сè уште не се подготвени за тоа.
Тој рече дека е „реалистичен и оптимист“ за постигнување мир во Украина, додавајќи дека внимателно ги следи активностите што ги преземаат Путин и Зеленски.
„Го следев тоа, го видов и разговарав за тоа со претседателот Путин и претседателот Зеленски. Нешто ќе се случи, но тие сè уште не се подготвени. Но, нешто ќе се случи. Ќе го направиме тоа“, рече тој во телефонско интервју за CBS.
Зборувајќи за неодамнешниот напад на Русија врз Украина, во кој беа убиени 15 лица, Трамп рече дека е незадоволен од ситуацијата, но дека ќе продолжи да се залага за мировен договор.
Трамп истакна дека мислел дека сè ќе се среди, но дека се покажало дека преговорите со Русија не биле лесни.
„Искрено, мислев дека оној со Русија ќе биде полесен од оние што ги запрев, но се чини дека е нешто што е малку потешко“, рече Трамп, според Танјуг.
Американскиот претседател рече дека неговиот пристап кон многу дипломатски преговори, без разлика дали со Русија и Украина или со други завојувани земји, е да ги собере клучните лидери во една просторија и САД да посредуваат во договор во реално време, честопати со негово водство, без да отфрлат никаква можност.
Тој пристап, рече, бара трпение, дури и кога се бара брзо решение, но верува дека се исплати во други мировни договори оваа година. „Имавме неколку многу добри денови, за среќа, и кога ги собирам во просторија, или барем ги натерам да разговараат, се чини дека функционира. Спасивме милиони животи“, рече Трамп.
Додаде дека ја гледал воената парада во Пекинг, на која присуствувале Путин, севернокорејскиот лидер Ким Џонг Ун и кинескиот претседател Си Џинпин.
„Ја разбирам причината зошто го правеа тоа и се надеваа дека јас гледам, и гледав. Мојот однос со сите нив е многу добар. Ќе откриеме колку е добар во текот на следната недела или две“, додаде Трамп.
