Претседателот на САД, Доналд Трамп, тврди дека Украина „нема да издржи ниту еден ден или два“ без американско оружје и опрема во војната со Русија. Тој ја даде изјавата пред новинарите во Белата куќа, пишува Европейская правда.
„Да не беше нашата армија и нашата опрема, Украина денес немаше да може да се бори за опстанок. Им дадовме опрема вредна стотици милијарди долари и најдобра опрема. И произведуваме најдобра опрема во светот. Без неа, тие немаше да издржат ниту еден ден или два“, рече тој.
Трамп се осврна и на испораката на противтенковски ракети на Украина, веројатно алудирајќи на преносните системи „Џавелин“ продадени на Киев за време на неговиот прв мандат како претседател.
„Се сеќавате на противтенковските ракети? Кога тенковите се заглавија во калта, а потоа ги поправија, бум-бум-бум-бум. Јас им го дадов тоа. Беше кажано: ‘Обама даде чаршафи, а Трамп даде едно од најдеструктивните оружја’“, рече американскиот претседател.
Синоќа, Претставничкиот дом на американскиот Конгрес усвои закон со кој се обезбедува воена помош за Украина, поддршка за обновата на земјата и воведување нови санкции против Русија.
Предлог-законот беше ставен на гласање преку посебна постапка, т.н. петиција за гласање, која ги заобиколи редовните комисии. На демократите им се придружија 18 републиканци и еден независен, Кевин Кајли, чие гласање овозможи да започне процесот.
Во меѓувреме, американскиот шеф на дипломатијата, Марко Рубио, сигнализираше дека наскоро се очекува објава за воена помош за Украина во вредност од 400 милиони долари, која Конгресот веќе ја одобри.
