Трамп воведува царини до 245% за Кина

Трговската војна меѓу двете најголеми светски економии нагло ескалира. Белата куќа објави дека Кина сега може да биде погодена со царини од дури 245% за извозот во САД, како резултат на нејзините „одмазднички мерки“, пренесува агенцијата Anadolu.

Ова е највисоката царинска стапка досега спомната, која е наведена во документ штотуку објавен, заедно со извршната наредба потпишана од американскиот претседател Доналд Трамп. Регулативата најави истрага за ризиците за националната безбедност на САД поради зависноста од увоз на преработени критични минерали и сродни производи.

На денешната прес-конференција портпаролот на кинеското Министерство за надворешни работи, Лин Џиан, беше прашан за тарифната стапка од 245%. Тој одговори дека „за конкретни бројки, треба да контактирате со американската страна“, објави кинескиот државен весник Global Times.

Трамп претходно воведе основна царина од 10% на увозот од сите земји, но привремено ги замрзна дополнителните „реципрочни“ царински стапки, кои требаше да се одредуваат поединечно по земјите во зависност од бариерите што ги поставуваат за американските производи.

Единствената земја изземена од таа пауза е Кина, која сега се соочува со дополнителен бран царини. Администрацијата на Доналд Трамп претходно ги предупреди земјите да не возвраќаат на американските царини, велејќи дека оние кои ќе се воздржат од одмазда ќе бидат наградени во идните трговски преговори.