Краткото примирје за православниот Велигден меѓу Украина и Русија, најавено од Владимир Путин во четвртокот и прифатено од неговиот колега Володимир Зеленски, треба да започне денеска попладне, додека дипломатските напори на САД за завршување на војната се забавуваат.
Кремљ посочи дека прекинот на огнот ќе стапи на сила в сабота во 16 часот (13:00 часот по Гринич) и ќе трае до крајот на недела, период од 32 часа.
Рускиот министер за одбрана Андреј Белошов и началникот на Генералштабот Валериј Герасимов добија наредба да „престанат со борбените операции во сите правци во овој период“.
Украинскиот претседател Володимир Зеленски кратко потоа објави дека неговата земја е подготвена да ја почитува оваа ретка пауза во непријателствата, бидејќи разговорите насочени кон завршување на четиригодишниот конфликт се заглавени поради војната на Блискиот Исток.
Слично примирје беше објавено минатата година, исто така за православниот Велигден, но двете страни се обвинија меѓусебно дека го прекршиле повеќе пати.
Пред почетокот на прекинот на огнот, властите во украинските региони Полтава (центар) и Суми (североисток) доцна во петокот објавија дека едно лице е убиено, а околу 15 други се ранети во два одделни напади.
Неколку рунди разговори спонзорирани од САД не успеаја да ги доближат завојуваните страни до договор, а процесот стана уште побавен бидејќи вниманието на Вашингтон се префрли на Иран.
Москва бара од Киев територијални и политички отстапки, што Володимир Зеленски ги одби, изедначувајќи ги со капитулација.
Според портпаролот на Кремљ, Дмитриј Песков, цитиран од новинската агенција ТАСС, објавувањето на ова кратко примирје не е поврзано со преговорите за прекин на конфликтот.
