Унгарскиот премиер Виктор Орбан изјави дека оваа земја е во преговори со администрацијата на американскиот претседател Доналд Трамп за „деловен договор“, пишува Reuters.
Орбан најави потпишување на овој договор, за кој речиси ништо не се знае, во следните шест месеци.
„Разговараме со Американците за економски прашања кои би биле поволни за нас. Тарифите ќе бидат негативни за нас, но преговараме за други економски договори за да компензираме“, рече Орбан без да даде повеќе детали.
Посебен проблем за Унгарија е царината од 25 отсто за автомобилите од Европската унија што ја наметна Трамп. Автомобилската индустрија сочинува 20 отсто од националниот БДП и вработува повеќе од 100.000 луѓе.
Сепак, Орбан се надева дека неговиот однос со Трамп, за кого има само пофални зборови, ќе ја „спаси“ Унгарија да не ги почувствува целосните ефекти од царините што ги воведе.
Со оглед на тоа што Унгарија е дел од ЕУ, не може да ги избегне тарифите наметнати на сите земји од овој блок, но, според унгарскиот премиер, директниот договор со САД ќе обезбеди доволно економска активност што царините нема да се почувствуваат.
