Западна Европа ги забележа најтоплите јуни и јули досега, со просечна температура од 21,62 степени Целзиусови. Ова е за 2,79 степени повисоко од просекот за периодот од 1991 до 2020 година, објави денеска одделот за климатски промени на европската програма Copernicus.
На рекордните температури им претходеше невообичаено долг период на топлина што започна кон крајот на пролетта, за време на кој беа регистрирани 4 топлотни бранови од крајот на мај.
Податоците, исто така, покажаа јасни температурни разлики низ целиот континент. Додека Западот постави рекорди, температурите се намалија кон Источна Европа и Скандинавија, каде што беше значително постудено.
Кога се гледа Европа како целина, јули беше само 11-ти најтопол месец досега, со просечна температура од 20,49 степени.
На глобално ниво, изминатиот месец беше вториот најтопол јули досега регистриран, изедначувајќи се со јули 2024 година. Просечната глобална температура беше 16,9 степени, што е за 1,47 степени над прединдустрискиот просек.
Апсолутен рекордер сè уште останува јули 2023 година, кога просечната глобална температура достигна 16,95 степени. Податоците од Copernicus се собираат од 1950 година, а за некои параметри се враќаат на претходните периоди.
