Жизел Пелико, која преживеа речиси десет години систематско силување, во кое учествуваа десетици мажи предводени од нејзиниот поранешен сопруг, ќе го тужи магазинот Paris Match за нарушување на приватноста, потврдија вчера нејзините адвокати, пишува The Guardian.
Во своето последно издание, Paris Match објави седум фотографии од Пелико во друштво на маж за кој тие опишуваат дека е нејзин партнер, направени додека шетаат по улиците на нејзиното ново место на живеење.
Пелико доби меѓународно признание минатата година откако се откажа од своето законско право на анонимност за време на судењето на нејзиниот поранешен сопруг и другите обвинети.
„Не ние треба да се срамиме, туку тие“, рече тогаш таа за сторителите.
Доминик Пелико, нејзиниот поранешен сопруг, ја дрогирал речиси десет години за тој и десетици непознати мажи кои ги нашол на интернет да ја злоставуваат. Доминик Пелико се изјасни за виновен и чуваше стотици снимки од нападите на неговиот компјутер во папката наречена „Злоупотреба“. Францускиот суд во декември го осуди на 20 години затвор.
„Секогаш кога ќе биде нарушена приватноста на нашиот клиент, ние ќе реагираме и ќе бараме судска одлука“, изјави вчера адвокатот Антоан Ками. Тој додаде дека е шокантно и разочарувачки што Paris Match тајно го фотографирал Пелико, личност чија траума е веќе документирана со 3.000 фотографии и видеа. Тој го обвини магазинот дека ништо не научил од четиримесечното судење.
На прашањето на AFP, Paris Match не сакаше да го коментира случајот. Жизел Пелико завчера се најде на листата на Тајм за највлијателни луѓе во светот за 2025 година.
