Ормутскиот Теснец (персиски: تَنگِه هُرمُز Tangeh-ye Hormoz, арапски: مَضيق هُرمُز Maḍīq Hurmuz) — е теснец помеѓу Оманскиот и Персискиот Залив.
Ова е единствениот излез на Персискиот Залив на отворен океан и една од најважните геостратешки точки во светот. На северниот брег се наоѓа Иран, а на јужниот се сместени Обединетите Арапски Емирати и оманската ексклава Мусандам. Во најтесниот дел, протокот е широк 39 километри (21 морска милја).
Низ теснецот минува 20% од вкупното количество нафтата во светот и 35% од сите нафтоносни пловила. Поради ова, местото е од големо стратешко значење во меѓународната трговија, и причина за конфликт помеѓу силите, особено САД и Иран.
Поради големата прометност, во Ормутскиот Теснец се имаат случено повеќе судири на бродови. За да се намали ризикот од вакви катастрофи, теснецот е поделен на две ленти - една за дојдовен и една за појдовен сообраќај. Од нив, едната се наоѓа во омански води, а другата во ирански.
Според Управата за енергетско информирање на САД, во 2011 г. низ протокот поминувале просечно 14 танкери дневно, носејќи 17 милиони барели (2.700.000 м³) сирова нафта. Ова претставува 35% од количеството на нафта што се превезува по морски пат и 20% од целиот нафтен сообраќај во светот. Во извештајот се вели дека 85% од сировата нафта била испорачана во Азија, најмногу во Јапонија, Индија, Јужна Кореја и Кина.
Разбирливо е дека блокирање на овој теснец би значело прекин на многу значајна трговија и разгорување на историски геополитички страсти.
