Шведската железничка компанија SJ им нуди на своите патници користење на биометриски чип вграден во раката наместо класични карти и со тоа ќе стане првата превозна компанија што ќе го користи овој иновативен метод.
Малиот чип функционира исто како бесконтактните банкарски картички и за проверка кондуктерите ја скенираат раката. Меѓутоа, проектот ќе се применува само на оние граѓани кои веќе имаат биометриски имплант: SJ нема да врши вградување на чипови на луѓе. Околу 2.000 Швеѓани имаат ставено импланти, а повеќето од нив работат во технолошката индустрија.
Од компанијата велат дека очекуваат околу 200 луѓе да почнат да го користат чипот за нејзините услуги, но дека мора да бидат регистрирани како членови на програмата за верни корисници.
Патниците ќе купуваат карти на вообичаен начин, преку веб-страницата или преку мобилна апликација, а нивниот членски број ќе биде поврзан со нивниот чип.
Од компанијата велат дека е само прашање на време кога ќе дојде денот кога сите ќе користат биометриски чипови наместо карти.
„Секако дека постојат различни мислења. Некои луѓе се загрижени за приватноста и тоа е нешто што ние многу сериозно го сфаќаме. Луѓето се збунети и мислат дека може некој да ги следи преку микрочип, а тогаш би требало да бидат загрижени и за мобилните телефони и користењето кредитни картички“, рече портпаролот на компанијата SJ.
Тој додава дека проектот бил активиран на барање на корисниците бидејќи чиповите се скенираат побрзо од картите и се поштедуваат вработените од дополнителен труд.