Новото истражување покажа дека мравките можат да откријат тумор во примерок од урина благодарение на нивните моќни миризливи рецептори.
Во истражувањето се наведува дека мравките од видот Formica fusca ги откриле туморите така што ја „мирисале“ урината на пациентите.
„Мравките може да се користат како био-детектори за да се разликуваат здравите индивидуи од оние со тумори. Тие се лесни за 'тренинг' бидејќи брзо учат, многу се ефикасни и не се скапи за одржување“, вели Патрициа Д'Еторе, авторка на истражувањето.
Органските соединенија, кои се ослободуваат во случаи на канцерогени тумори, се присутни во физиолошките течности, вклучувајќи пот, урина, па дури и пареа од здив.
Водачот на истражувањето и главен автор, Баптист Пикерет, и неговиот тим започнале ксенотрансплантација на тумори на рак на дојка кај глувци и го овозможиле неговиот развој. Потоа, научниците земале примероци од урина од здрави и болни животни за да ги анализираат.
Во студијата, мравките успеале да го поврзат мирисот на тумор со награда со тоа што добивале капка засладена вода пред примерок од урина од болен глушец. По повлекувањето на шеќерната вода останувале во близина на урината на болните глувци околу 20% подолго отколку кај урината на здравите глувци, бидејќи барале од вкусниот десерт. Мравките се „научиле“ на новата задача по само три тренинзи, или вкупно 10 минути. Ова е многу побрзо од кучињата кои откриваат рак, бидејќи нивната обука трае и до 6 месеци.
„Ги научивме да го поврзуваат мирисот на рак со награда. Покажавме дека мравките можат да разликуваат урина од здрави и болни глувци. Бевме изненадени колку се сигурни и ефикасни мравките“, додава Д'Еторе.
Црните мравки познати како Formica fusca живеат низ цела Европа, но и во одредени региони на Јужна Азија и Африка.
