Чилеанскиот репрезентативец, кој се наоѓа на излезна врата од Барселона, обвини дека неуспесите на тимот се поради тоа што во составот има само 13 професионалци.
„Изминативе три години не се она што тим како Барселона заслужува. Најдобриот тим на светот не може да има само 13 професионални играчи. Не се победува секогаш со ДНК. Меси е најдобар на светот, вистински вонземјанин, но него му треба помош со цел да се остварат подобри резултати“, вели Видал во интервју за YouTube каналот на Daniel Habif.
Артуро Видал е во Барселона од летото 2018 кога дојде од редовите на Баерн. Претходно настапуваше за Јувентус, Баер Леверкузен и Коло-Коло.
„Никогаш не можев да разберам зошто на играчите им се става етикета 'трансферни'. Тоа е премногу грдо. Ако некој играч сака да си замине или клубот сака да го продаде, најдете му тим, ама не го етикетирајте на тој начин. Секоја личност заслужува почит“, додаде 33-годишниот играч од средниот ред.
Чилеанецот се пожали и на начинот на кој Браселона се обидува да се ослободи од него. И покрај таквиот однос, тој категорично изјави дека нема намера да се пресели кај најлутиот ривал Реал Мадрид и тоа поради почит за Каталонците.
„Јас сега се наоѓам во ситуација кога сум оттурнат од клубот, буквално фрлен како мамка за да видат дали некој ќе сака да ме земе. Сепак, не би заминал во Реал Мадрид од почит кон Браселона“, заврши тој.