За легендарниот голгетер Кристијан Виери на миланското дерби се покажал само еден тим, а само благодарение на голманот Џанлуиџи Донарума Милан не доживеал понижување.
„Тоа што го видовме саботата вечер не беше натпревар. Видовме еден одличен Интер, што и беше нормално со оглед на тоа што неколку денови претходно одиграа лош натпревар. Јасно беше дека ќе удрат жестоко, агресивно, со пресинг и желба. Милан скоро и да не направи ништо, само таа шанса на Сусо. Да не беше Донарума, Интер ќе победеше со 5 или 6 спрема 0“, изјави Виери во емисијата Tiki Taka на Italia 1.
Виери во својата кариера играше за двата милански клуба, но ѕвездените мигови ги доживеа во Интер, додека во Милан играше на крајот од кариерата. Како докажан голгетер, не можеше а да не го птокоментира и мајсторскиот гол со глава на Ромелу Лукаку.
„Одличен гол, убав. Конте го сакаше по секоја цена и во право беше што го донесе“.
Но, голот на Лукаку беше вториот, а резултатот го отвори Брозовиќ: „Сите очекуваа нафрлување, а наместо тоа Сенси му подаде на Брозовиќ кој реши да шутира“.
Интер влезе во дербито по еден крајно разочарувачки натпревар од Лигата на шампиони кога на „Меаца“ чешката Славија одигра 1:1, а малку фалеше и да слави победа.
„Луѓето не се нормални. По натпреварот од Лигата на шампиони против Славија фрлаа со дрва и камења по сите играчи. Три дена подоцна ги величаат сите“, заврши популарниот Бобо Виери.