Бразилецот Вилијан (32) со емотивна порака се збогува од Челси откако стана јасно дека ќе замине од клубот. Кариерата ќе ја продолжи во Арсенал со кој веќе ги договори сите услови.
Вилијан во 2013 година стигна во Челси и оттогаш одигра вкупно 399 натпревари за овој клуб, постигна 63 голови и запиша 62 асистенции.
Во збогувањето рече дека донел правилна одлука во 2013 година да дојде во Челси, но дека сега е време да продолжи понатаму.
„Ова беа одлични седум години. Во август 2013 година кога ја добив понудата од Челси знаев дека тоа е местото кадешто сакам да играм, а денес сум сигурен дека ја донесов вистинската одлука. Имаше многу среќни и некои тажни моменти, освоив и по некој трофеј и секогаш беше тензично.
Сега дојде време да продолжам понатаму, а најмногу ќе ми недостигаат соиграчите и вработените во клубот кои со мене се однесуваа како кон син. Секако, ќе ми недостигаат и навивачите и заминувам со крената глава бидејќи знам дека овде освоив нешто и секогаш давав сѐ од себе во дресот на овој клуб.
Од срце се заблагодарувам на сите и нека ве чува Господ“, напиша Вилијан на Twitter.
Сепак, бројни навивачи на Челси сепак се огорчени и не можат да му простат на Бразилецот што замина токму кај најголемиот градски ривал.
Вилијан во Арсенал ќе премине без обештетување, а главни причини за неговото заминување кај најжестокиот ривал се големата желба на Микел Артета да го донесе во своите редови, можноста да остане во Лондон и обновената дружба со Давид Луиз кој го продолжи договорот со „Топџиите“.