Лондон, 9 јули 2019 (МИА) – Седумкратната шампионка на Вимблдон, Серена Вилијамс е казнета од организаторите на најстариот и најпрестижниот Гренд-слем турнир. Поранешната број 1 во светот е санкционирана со 10.000 долари за нанесена штета на тревната покривка на еден од терените.
На 30 јуни, ден пред официјалниот старт на турнирот, за време на еден од тренинзите пред почетокот на турнирот, Серена силно го удрила рекетот од земјата, во текот на тренинг. Со тоа го оштетила тревникот кој сепак беше обновен до почетокот на натпреварите.
Снимки од камерите покажуваат дека сторила слично нешто на теренот број 15, два дена претходно.
Двајца други тенисери добија парични казни во Лондон. Фабио Фоњини е казнет со 3.000 долари, откако во дуелот против Тенис Сандгрен од третиот круг многу се налути и гласно посака во комплексот „да експлодира бомба“.
– Дали е чесно да се игра овде? Проклет Англичани, навистина. Се надевам дека во овој клуб ќе експлодира бомба, рече тој во петтиот гејм од вториот сет, а микрофоните ги фатија неговите зборови.
Скандалозниот Ник Кириос е казнет со 8.000 долари за различни неспортски манифестации за време на натпреварите од првиот и вториот круг.