Бразилскиот фудбалер Винисиус Жуниор, како и неговиот соиграч од Реал Мадрид, Килјан Мбапе, стана сопственик на фудбалски клуб.
Имено, Винисиус стана косопственик на португалскиот второлигаш Алверка откако поранешниот сопственик Рикарду Висинтин го продаде својот удел.
„ФЦ Алверка – Футебол објавува дека Рикарду Висинтин го продаде својот удел во јавното ограничено друштво на група шпански и бразилски инвеститори“, се вели во клупското соопштение.
Новите сопственици, според португалскиот весник Record, ќе бидат претставени во следните неколку недели.
Напоменуваат и дека станува збор за конзорциум од шпански и бразилски инвеститори, меѓу кои е и Винисиус Жуниор.
🚨 Vinícius Júnior conclui a compra do FC Alverca e passa a ser dono de 70% a 80% da SAD, avança o jornalista Bruno Andrade no @UOL. pic.twitter.com/rXTBpWD9EZ
— Diário de Transferências (@DTransferencias) February 17, 2025
Алверка моментално е второпласирана во португалската втора лига и има добри шанси да стигне до тамошната елита, и тоа експресно со оглед на тоа што минатата сезона беше прва во третата лига.
Станува збор за стар клуб формиран во 1939 година во градот Алверка ду Рибатежу, во околината на престолнината Лисабон. Вкупно 5 сезиони има настапувано во Примејра лига, најдобрата португалска лига, и тоа од 1998/1999 до 2001/2002, како и во сезоната 2003/2004.
Да потсетиме дека минатото лето Мбапе инвестираше 20 милиони евра во мнозинскиот пакет акции во Каен, кој се натпреварува во француската втора лига.
