Чевлите со високи потпетици речиси имаат некакви волшебни моќи: жените велат дека во нив се чувствуваат помоќни, посекси и посамоуверени. Но, која е вистинската цена што се плаќа за нив?
Ако високите потпетици ви се омилените обувки и обожавате да го гледате светот „од високо“ кога сте во нив, подгответе се за малку добри и лоши вести.
Според една анкета спроведена неодамна во Велика Британија, жените кои носат високи потпетици им делуваат попривлечно и на мажите и на жените.
Речиси две третини од анкетираните жени рекле дека се чувствуваат посекси кога носат високи потпетици, дека тоа им ја крева самодовербата и дека имаат подобро мислење за себе.
Слично реагирале и мажите: според одговорите на испитаниците, има два пати поголема шанса да им се насмевнат на жени во чевли со висока потпетица отколку на жени облечени во патики или балетанки. Исто така, два пати е поголема веројатноста да ѝ понудат помош на жена облечена во штикли.
Меѓутоа, ова истражување покажа уште една, „помрачна страна“.
Повеќето жени признале дека носењето високи потпетици обично има последици: болни и отечени стапала, плускавци, болки во грбот.
Лекарите се согласуваат: Обувките со високи потпетици предизвикуваат болки во долниот дел од грбот, повреди на зглобовите, воспаленија на тетивата, појава на „попуштени“ и отечени вени, болка во мускулите на нозете, плускавци, а исто така го зголемува ризикот од деформирање на стапалото.
Дали сте подготвени да ја платите оваа цена за една „доза самодоверба“ од носењето високи потпетици, проценете сами.