Витаминот Д има важна улога во нашиот организам, а некои научници веруваат дека може да помогне заразените со SARS-CoV-2 да избегнат тешка клиничка слика. Други мислат дека е залудна надеж, односно бескорисен, пишува DW.
Резултати од студии на оваа тема сè уште нема, па останува да видиме што ќе покажат идните истражувања. Сепак, витаминот Д е во тренд. Нивото во организмот на витамин Д опаѓа и расте под влијание на сончевите зраци. Ако кожата впива доволно УВ-зраци, телото е способно само да го произведе. Преку исхрана може да се внесе само 10 до 20 проценти од потребниот витамин.
Анализа на Универзитетот во Хохенхајм сега ги поврза недостатокот на витамин Д, одредени заболувања и тешката клиничка слика среде зараза со коронавирусот.
„Постојат бројни индиции дека разни незаразни болести како висок крвен притисок, дијабетес, болести на кардиоваскуларниот систем и слично, се поврзани со ниското ниво на витамин Д. Таквите придружни заболувања, заедно со недостатокот од витамин Д го зголемуваат ризикот од тежок развој на COVID-19“, стои во анализата.
Во тек се истражувања за нивото на витамин Д во човечкиот организам и што укажува тоа.
„Нивото на витамин Д е добар показател доколку некој е болен. Но, не е повеќе од тоа“, вели ендокринологот Мартин Фаснахт од Универзитетската клиника во Вирцбург.
Според него, досегашните студии не потврдија дека витаминот Д има исцелителска функција. Во анализата на Универзитетот пишува дека кај заразените со коронавирусот веднаш било проверено нивото на витамин Д, со цел да се подигне ако е прениско, но Фаснахт не верува дека тоа би придонело за нешто. Тој потсетува дека се пропаднати сите досегашни клинички обиди да се промени текот на болеста со додавање на витамин Д.
Сепак, смета дека вреди да се проба, бидејќи никогаш не се знае.
„Не сакам да ја исклучам можноста кај одредени подгрупи на пациенти да дојде до подобрување со давање на витамин Д“, вели тој.
Сепак, во тек се бројни студии на оваа тема, па наскоро јавноста ќе дојде до цврсти и сигурни научни сознанија за поврзаноста на витаминот Д и коронавирусот.