Дванасет граѓани биле санкционирани од полицијата во градовите Битола, Велес и Кавадарци.
Вкупно осум прекршувања се регистрирани синоќа за време на полицискиот час на територијата на СВР Велес, од нив во Кавадарци 5, а во Велес 3. Во Неготино не бил регистриран ниту еден прекршок. Од СВР Велес информираат дека против прекршителите ќе бидат превземени санкции.
Инаку, на територијта на СВР Велес 353 граѓани се во самоизолација кои се под контрола на полицијата. Од нив 122 се во Велес, во Кавадарци 127 и во Неготино 104 граѓани.
Основното јавно обвинителство Битола во текот на денешниот ден до Основниот суд Битола достави предлози за издавање казнени налози против четири лица кои биле затекнати при непочитување на забраната за движење во текот на полицискиот час, информираат од Јавното обвинителство.
– Лицата се обвинети за кривично дело - Непостапување според здравствените прописи за време на епидемија од член 206 став 1 од Кривичниот законик. Имено, тие не постапиле според прописите и наредбите со кои се определуваат мерки за сузбивање или спречување на заразната болест COVID-19, односно не ја почитувале Одлуката за забрана и посебен режим на движење на територијата на Република Северна Македонија, се вели во соопштението на обвинителството.
Обвинителството на Судот му предложи да определи парична казна за секој од обвинетите во висина од 100 дневни глоби при што вредноста на една глоба да се определи на 20 евра во денарска противвредност.