Српскиот напаѓач и голгетер на Фиорентина уште отсега е нестрплив за настап на Мундијалот кој ќе се одржи дури по една година.
Србија синоќа направи огромно изненадување победувајќи ја Португалија среде Лисабон и тоа со гол во 90-тата минута. Србите се пласираа на Мундијалот во Катар, а Португалија ја испратија во баражот, каде можеби и ќе игра против Македонија.
„Веќе разговаравме пред натпреварот, што и да се случи, да останеме смирени, да бидеме сконцентрирани и дека на крајот ќе победиме. Верувавме во тоа, од март се зборуваше дека овој натпревар ќе биде одлучувачки. Секако дека посакувавме порано да има разрешница, но вака е послатко. Ние 23 со стручниот штаб, сите сме херои. Вложивме максимум и на крајот сето тоа ни се врати. Едвај го чекам Светското првенство, да одиме таму и да направиме голем резултат“, рече Влаховиќ во изјава за ФСС.
Србија играше и на последното Светско првенство во Русија, но испадна уште во фазата по групи откако ја победи само Костарика, а загуби од Бразил и Швајцарија.
„Не сакам да отидеме таму и да испаднеме во група. Да отидеме таму за да направиме резултат, имаме квалитет и желба. Чувството е неверојатно. Благодарност до сите за поддршката, се надевам дека вака ќе продолжиме“, додаде тој.
Мундијалот во Катар ќе се игра од 21 ноември до 18 декември наредната година.