Малверите стануваат сѐ пософистицирани, во обид да се дојде до личните податоци на корисниците.
Истражувачите кои се занимаваат со безбедност на телефоните објавија дека има нов малициозен софтвер за Android кој е маскиран во „критичко ажурирање на системот“ и може да преземе целосна контрола врз уредот на корисникот и да ги украде личните податоци.
Малверот е најден во апликацијата наречена „Ажурирање на системот“, која треба да се инсталира надвор од Google Play, продавницата за Android апликации. Откако корисникот ќе ја инсталира, апликацијата се крие и тајно испраќа податоци од уредот на жртвата до хакерите.
Zimperium, компанија за заштита на мобилната телефонија која го откри малверот, соопшти дека откако жртвата ќе ја инсталира штетната апликација, телефонот може да се контролира од далечина.
Шпионскиот софтвер може да украде пораки, контакти, обележувачи на прелистувачи и историја на пребарување, да снима повици и амбиентален звук и да фотографира со камерите на телефонот. Малициозниот софтвер исто така ја следи локацијата на жртвата, пребарува датотеки со документи и вади копирани податоци од „кешот“ на уредот.
Оваа апликација, исто така паметно се крие, па за да не биде „фатена“ испраќа делови од фотографии од телефонот наместо цели фотографии, а со тоа не троши голема количина на податоци.
Извршниот директор на Zimperium, Шридхар Митал изјави дека тоа е веројатно дел од насочен напад.
„Тоа е најсофистицираното нешто што сме го виделе“, рече Митал, додавајќи дека смета дека е потрошено многу време и напор за создавање на оваа апликација. „Сметаме дека има и други вакви апликации и се обидуваме да ги најдеме што е можно побрзо“, вели тој.
Бидејќи истражувачите потврдија дека вирусот е инсталиран надвор од продавницата Google Play, корисниците се советуваат добро да проверат пред да инсталираат што било што не е од проверени места, како што се официјалните продавници за апликации, истакнувајќи дека најдобро е апликациите што не доаѓаат од проверено место воопшто да не ги инсталирате.