По сѐ изгледа летово Хари Мегваер ќе мора да го напушти Манчестер Јунајтед, а како негова следна дестинација се издвојува Чизмата.
И покрај тоа што за капитенот на Јунајтед интерес покажува премиерлигашот Вест Хем, британскиот таблоид The Daily Mail тврди дека Хари Мегваер на лето ќе се пренеси не само во нов клуб, туку и во нова лига откако на негова адреса веќе пристигнале неколку интересни понуди од Серија А.
The Daily Mail пишува дека за неговите услуги се заинтересирани речиси сите италијански гиганти, со исклучок на шампионот Наполи. Станува збор за Интер, Милан, Рома и Јувентус.
Интер уште зимата пројави интерес за 30-годишниот англиски репрезентативец, откако стана јасно дека ќе остане без Милан Шкриниар, кој како слободен играч ќе се пресели во ПСЖ. Токму во Мегваер „Нераѕурите“ ја гледаат замената за одличниот Словак.
Милан планира да го засили тимот за наредната сезона да биде конкурентен за Скудетото, а еден од играчите кои би можеле да дојдат во Милано од Островот е токму Мегваер.
И Жозе Мурињо го сака Англичанецот во редовите на својата Рома. Специјалниот сака Мегавер и Крис Смолинг да бидат англиски водечки бедем во сезонава килавата одбрана на „Волчицата“.
Последен во низата заинтересирани калчолигаши е Јувентус. Имено, „Старата дама“ по разочарувачката сезона во која не освои ниту еден трофеј и воедно поради казната со одземање на бодови остана и без пласман во Лигата на шампионите, е решена наредната сезона да го брка Скудетото. Со пензионирањето на Леонардо Бонучи наредното лето, во одбраната се отвора место кое треба да го пополни токму Мегваер.
Дали воопшто ќе дојде до трансфер на Мегваер во Италија, останува летото да покаже. Во секој случај, според The Daily Mail, ниту еден од калчолигашите не е подготвен целосно да го откупи договорот на Мегваер од Јунајтед, туку да го донесе на позајмица за која би одвоил одредена ситна сума. Воедно проблем претставува и високата плата, па веројатно „Црвените ѓаволи“ и да го пратат на позајмица би биле приморани да му плаќаат дел од платата.
Мегваер во Јунајтед пристигна како огромно засилување летото 2019 година од редовите на Лестер и тогаш стана најкскап англиски дефанзивец откако клубот од Манчестер плати 87 милиони евра. Сезонава најчесто беше резерва, а одигра само 16 натпревари во Премиер лигата, 4 во ФА купот, 4 во Лига купот и 7 во Лига Европа.
Договорот со „Ѓаволите“ му е до јуни 2025 година, а моменталната вредност според реномираниот Transfermarkt му е 25 милиони евра.
