Ерата на супер-брзи автомобили веќе започна, и компаниите како Bugatti и Koenigsegg се натпреваруваат меѓу себе кој може да произведе автомобил кој ќе оди побрзо. Сега, се појави трета компанија која сака да им го украде приматот.
Откако неколку години навестуваше за такво нешто, автомобилската компанија Devel, со седиште во Дубаи, промовираше концепт за автомобилот Devel Sixteen, кој се стреми да биде најбрзиот автомобил во сериско производство.
Автомобилот беше претставен на публиката на Dubai International Motor Show 2017, саем за автомобили кој се одржува секоја година.
Креаторите на Delta Sixteen велат дека овој автомобил би требало да ја достигне брзината од 480 километри на час, што би било доволно за тој да стане најбрзиот автомобил во сериско производство.
Според челниците на компанијата, спецификациите на овој модел се многу подобри од оние на Bugatti Chiron или Koenigsegg Agera RS.
Компанијата би требало да го издаде серискиот модел од овој автомобил за 12 до 18 месеци од сега, откако ќе заврши комплетното тестирање на моделот.
Најголемиот проблем на компанијата им претставуваат гумите, кои покажуваат знаци на слабост кога автомобилот постигнува големи брзини.
„Засега имаме мали проблеми со гумите, но тоа е само поради фактот што не ги пронајдовме вистинските гуми за овој автомобил. Кога ќе ги пронајдеме вистинските, нема да има никаков проблем нашиот Sixteen да постигне брзина од 480 км/ч“, вели Рашид Ал Атари, девелопер во Devel.